33 წელი 9 აპრილის ტრაგედიიდან
9 აპრილის ტრაგედიის 33 წლისთავთან დაკავშირებით, ვეტერანების საქმეთა სახელმწიფო სამსახურის დირექტორის მოადგილემ, მირონ ჩიგოგიძემ, სამსახურის თანამშრომლებთან და ვეტერანებთან ერთად, დღეს, გამთენიისას, რუსთაველის გამზირზე, მთავრობის სასახლის წინ, საქართველოს დამოუკიდებლობისათვის 9 აპრილს დაღუპულ გმირთა მემორიალი ყვავილებით შეამკეს და მათ ხსოვნას პატივი კიდევ ერთხელ მიაგეს.
1989 წლის 9 აპრილს, გამთენიისას, თბილისში, რუსთაველის გამზირზე, მთავრობის სასახლის წინამდებარე ტერიტორიაზე, საბჭოთა არმიამ, საქართველოს დამოუკიდებლობის მოთხოვნით მოწყობილი ანტი-საბჭოთა, მშვიდობიანი, საპროტესტო დემონსტრაცია დაარბია, რის შედეგადაც, 21 უდანაშაულო ადამიანი, უმეტესწილად, ქალები დაიღუპნენ; დაღუპულთა შორის იყვნენ სკოლის მოსწავლეებიც_მათგან ყველაზე უმცროსი, ეკა ბეჟანიშვილი, მხოლოდ 15 წლის იყო.
9 აპრილის დარბევის შედეგად, 4 ათასზე მეტმა დემონსტრანტმა, სხვადასხვა სახის ტრამვა მიიღო; დაუდგენელი ქიმიური ნივთიერებით კი _ 2000-მდე მოქალაქე მოიწამლა.
1991 წლის 9 აპრილს, ტრაგედიიდან 2 წლის შემდეგ, საქართველოს რესპუბლიკის უზენაესმა საბჭომ, საქართველოს დამოუკიდებლობის აღდგენის აქტი მიიღო. მას შემდეგ, საქართველოს უახლეს ისტორიაში, 9 აპრილი, ეროვნული ტრაგედიისა და, ამავდროულად, საქართველოს დამოუკიდებლობის დღედ აღინიშნება.
მიმდინარე წლის 8 აპრილს, თბილისის საკრებულოს სახელდებისა და სიმბოლიკის კომისიის სხდომაზე, დედაქალაქში, ქუჩებისთვის 1989 წლის 9 აპრილს დაღუპულთა_ ნინო თოიძის, ნატო გიორგაძის, ვენერა მეტრეველის, აზა ადამიას, მარინა ჭყონია-სამარგულიანის, ნანა სამარგულიანის, ზაირა კიკვიძის, ნოდარ ჯანგირაშვილის, მამუკა ნოზაძის და შალვა ქვასროლიაშვილის სახელების მინიჭების საკითხები განიხილეს. ქუჩების სახელწოდების ცვლილებას, თბილისის საკრებულო, უახლოეს სხდომაზე დაამტკიცებს. აღსანიშნავია, რომ დედაქალაქის 11 ქუჩა, 9აპრილის გმირთა სახელებს უკვე ატარებს.
დიდება გმირებს!
9 აპრილს დაღუპული გმირები:
ეკა ბეჟანიშვილი, 15 წლის
თამარ ჭოველიძე, 16 წლის
ნათია ბაშალეიშვილი, 16 წლის
აზა ადამია, 22 წლის
ნატო გიორგაძე, 23 წლის
თამუნა დოლიძე, 28 წლის
თინა ენუქიძე, 70 წლის
ნინო თოიძე, 22 წლის
ზაირა კიკვიძე, 61 წლის
მანანა ლოლაძე, 34 წლის
თამარ მამულაშვილი, 50 წლის
ვენერა მეტრეველი, 45 წლის
მამუკა ნოზაძე, 21 წლის
ნანა სამარგულიანი, 41 წლის
შალვა ქვასროლიაშვილი, 35 წლის
მარინა ჭყონია-სამარგულიანი, 31 წლის
ელისო ჭიპაშვილი, 25 წლის
ნოდარ ჯანგირაშვილი, 40 წლის
მზია ჯინჭარაძე, 43 წლის
მანანა მელქაძე, 26 წლის
გია ქარსელაძე, 25 წლის
მადლობა თავისუფლებისთვის!
