34 წელი ავღანეთიდან საბჭოთა ჯარების გამოყვანიდან
მიმდინარე წლის 15 თებერვალს, ავღანეთის ისლამური რესპუბლიკიდან საბჭოთა ჯარების გამოყვანიდან 34 წელი შესრულდა.
ამ თარიღთან დაკავშირებით, ვეტერანების საქმეთა სახელმწიფო სამსახურის დირექტორის მრჩეველმა, ვლადიმერ იმნაძემ, სამსახურის წარმომადგენლებთან და “ავღანეთის ვეტერანთა საქართველოს კავშირის’’ წევრებთან ერთად, თბილისში, ზღვის უბანში, ავღანეთში დაღუპულთა მემორიალი გვირგვინით შეამკეს და მათ ხსოვნას პატივი მიაგეს.
1979 წლის 27 დეკემბერს, საბჭოთა არმიის ნაწილები ავღანეთში შეიჭრნენ, დაამხეს პრეზიდენტი ჰაფიზულა ამინი და ქვეყანაში კომუნისტური წეს-წყობილების იძულებით დამყარებას შეეცადნენ. 9 წლიანი სამხედრო დაპირისპირება რომლის დროსაც, 13 ათასზე მეტი საბჭოთა ჯარისკაცი დაიღუპა, ავღანეთიდან საბჭოთა ჯარების გამოყვანით და მალე კომუნისტური იმპერიის დაშლით დასრულდა.
ავღანეთის ისლამური რესპუბლიკა, საბჭოთა ჯარებმა, 1989 წლის 15 თებერვალს დატოვეს. 9 წლის განმავლობაში, ავღანეთში საქართველოდან 5000-მდე ჯარისკაცი იბრძოდა, 128 დაიღუპა, 6 კი _დღემდე უგზო-უკვლოდ დაკარგულად ითვლება.
ავღანეთის ომის არა ერთმა ვეტერანმა იბრძოლა და გმირულად დაეცა ბრძოლის ველზე საქართველოს ტერიტორიული მთლიანობისათვის აფხაზეთსა და სამაჩაბლოშიც.
ვეტერანების საქმეთა სახელმწიფო სამსახურის წარმომადგენლები, ავღანეთისა და საქართველოს ტერიტორიული მთლიანობისათის ომების ვეტერანები, დაღუპულ მეომართა ოჯახის წევრები, ყოველი წლის 15 თებერვალს იკრიბებიან თბილისში, ზღვის უბანში, ავღანეთში დაღუპულთა მემორიალთან და პატივს მიაგებენ ავღანეთში დაღუპული მეომრების ხსოვნას.
